اسلام آباد۔24مئی (اے پی پی) وفاقی وزیر ماحولیاتی تبدیلی سینیٹر شیری رحمان آکھیے جو اساں ماحولیاتی تبدیلیاں دے حوالے نال تباہی آلے پاسے کھڑوں لیکن عالمی رہنما وعدیں توں اڳوں نی ودھدے پئے ، جمہوریت ہی حکمرانی دا ھکو طریقہ اے جیں اچ عوام اتے اتفاق رائے شامل ہوندن ۔ اے ڳالھ انہاں ڈیووس اچ جاری ورلڈ اکنامک فورم اچ “فیوچر آف ڈیموکریسی” دے عنوانتوں ھک تقریب اچ خطاب کریندے ہوئیں آکھی اے ۔ وفاقی وزیر آکھیے جو جمہوریت تے حقیقی بحث نی تھیندی پئی جیڑھی ہووݨی چاہیدی اے ،دنیا اچ ودھدی ہوئی عدم مساوات دی نشاندہی نی کیتی ڳئی ،جنوب اتے مغرب دے درمیان فرق ودھدا پئے۔ شیری رحمان آکھیے جو آمرانہ نظام کہیں وی چیز دا بہتر حل نی تھی سڳدا ،پاکستان جیہے اوکھے تے کثیر ثقافتی ملک دے مسئلیں دا جمہوریت ہی ھکو حل اے ،جمہوریت کمزور طبقیں دی نمائندگی اتے حفاظت کریندی اے ، جمہوریت اچ سوال، شفافیت اتے جوابدہی دا عمل ہوندے ۔ انہاں آکھیے جو آمرانہ حکومتاں زیادہ امداد گھندن لیکن اواتفاق رائے تے قائم نی ہوندیاں ،جمہوریت ہی زندگی اتے حکمرانی دا ھکو طریقہ اے جیندے وچ عوام دی اتفاق رائے شامل ہوندی اے ۔ شیری رحمان آکھیے جو یوکرین روس جنگ دنیا اچ وسائل دا بحران پیدا کریسی ،ایں ویلھے ہر کوئی یوکرین اتے روس جھیڑے تے ڳالھ کریندا پئے۔ وفاقی وزیر آکھیے جو افغانستان تے عراق اچ انسانی بحران بارے دنیا دا کیا خیال اے؟ایندی ذمے واری کوئی کیوں نی گھندا پیا ؟کیا افغانستان، شام تے عراق دے پناہ گزین یورپی باشندیں توں گھٹ انسان ہن ؟۔ انہاں آکھیے اقدار کوں ساریں کیتے برابر ہووݨا چاہیدے ، اساں ماحولیاتی تبدیلی دے حوالے نال تباہی آلے پاسے کھڑوں لیکن عالمی رہنما وعدیں توں اڳوں نی ودھدے پئے ،زیادہ آلودگی کھنڈاوݨ آلیاں وݙیاں کمپنیاں کوں سماجی ذمہ واری دا مظاہرہ کرݨا چاہیدے۔
