اسلام آباد۔20مارچ (اے پی پی) وزیر داخلہ شیخ رشید احمد آکھیا جو او آئی سی اجلاس ناکام ٻݨاوݨ دا بیان غیر ذمہ دارانہ اے، سامراجی عناصر پاکستان دی بدلدی ہوئی آزاد خارجہ پالیسی دے خلاف سازشاں کریندے پئن، میݙا دل گواہی ݙیندا پئے جو اتحادی عمران خان نال تھیسن اتے منحرف ارکان وی واپسی آ ویسن۔ ریڈ زون اچ ٻݨی اہم عمارتاں ایف سی اتے رینجرز دے حوالےکر ݙتی ڳئن، ستاوی مارچ کوں حکومت اتے اپوزیشن دے جلسیاں کوں سکیورٹی ݙیسوں اتے انہاں دے راہ اچ کوئی رکاوٹ کائنا کھڑیسوں۔ پر جئیں وی قانون ہتھ اچ گھنݨ دی کوشش کیتی اوندے خلاف قانونی کاروائی تھیسی۔عمران خان دے خلاف اگر عدم اعتماد کامیاب تھی وی ویندی اے تاں جیڑھا حشر او اپوزیشن دا سڑکاں تے کریسی اوں کیتے تیار رہوݨاں چاہیدے۔ اتوار کوں اسلام آباد اچ پریس کانفرنس توں خطاب کریندیں ہوئیں انہاں آکھیا جو اسلامی تعاون تنظیم دے وزرائے خارجہ دی کانفرنس اسلام آباد اچ تھیندی پئی اے، ایں کانفرنس کوں ناکام ٻݨاوݨ دی کوشش کرݨ آلا سامراجی ایجنٹ اے۔ کہیں اچ جرات اے تاں او آئی سی کانفرنس اچ مدخلت کر تے ݙکھاوے۔ انہاں آکھیا اگر پنجوی مارچ کوں اجلاس تھیندےتاں ست ݙینھ دے اندر عدم اعتماد تے گنتری تھیسی۔ میݙا دل گواہی ݙیندا پئے جو اتحادی وی مشورہ کر تے عمران خان نال تھیسن ، جیڑھا اصلی تے نسلی ہوسی او عمران خان نال تھیسی۔
