جنیوا۔30جولائی(اے پی پی)چیئرمین سینیٹ سید یوسف رضا گیلانی جنیوا اچ انٹر پارلیمنٹری یونین (آئی پی یو) ولوں تھیوݨ آلی سپیکرز دی چھیویں عالمی کانفرنس دے موقع تے نیپال دی ایوان نمائندگان دے سپیکر معزز دیوراج گھمیری نال ملین۔ انہاں پاکستان اتے نیپال وچال خوشگوار اتے دوستانہ تعلقات دا عزم دوہریندے باہمی احترام، علاقائی مفادات اتے عوامی روابط تے الایا۔ چیئرمین سینیٹ نیپال نال پارلیمانی سفارتکاری، تجارت، تعلیم، سیاحت اتے ثقافتی تبادلے دے شعبیاں اچ ݙو طرفہ تعاون ٻیا ودھاوݨ دا عزم ݙسایا۔ ݙوہائیں رہنماواں امن اتے جامع ترقی دے ودھارے کیتے مکالمے اتے تعاون دی اہمیت تے زور ݙیندے ماحولیاتی تبدیلی، قدرتی آفات نال نبڑݨ دی صلاحیت اتے پائیدار ترقی دے اہداف سانڳے باہمی تعاون تے اتفاق کیتے۔ سپیکر دیوراج گھمیری نیپالی طلباء کوں پاکستان دے معیاری تعلیمی اداریاں اچ سکالرشپس ݙیوݨ تے حکومت پاکستان دا شکریہ ادا کیتا اتے آکھیا جو ایںڄھے تعلیمی روابط عوامی سطح تے تعلقات ودھیندن اتے طویل المدتی روابط ڳنݙھیندن۔ چیئرمین سینیٹ سپیکر دیوراج گھمیری کوں 11 توں 12 نومبر 2025 کوں اسلام آباد اچ تھیوݨ آلی سپیکرز کانفرنس اچ شرکت دی دعوت ݙتی، جیکوں انہاں خوش دلی نال قبول کر ڳھدا۔
