اسلام آباد۔27اگست (اے پی پی) وفاقی کابینہ ادارہ جاتی اصلاحات کمیٹی دی سفارشات دی منظوری ݙیندے اداریں کوں ضم و تحلیل کرݨ نال متوقع طور تے متاثر تھیوݨ آلے ملازمین دے مفادات دا تحفظ یقینی بݨاوݨ سانڳے کمیٹی بݨا ݙتی جݙاں جو مختلف وزارتاں دے 82 سرکاری اداریں کوں ضم اتے تحلیل کرتے 40 ایجھے اداریں اچ بدالیا ویندا پئے جنھاں اچ ڈیجیٹائزیشن،سمارٹ مینجمنٹ، ایفیشینٹ گورننس، منصوبیں تے شفاف اتے تکھے عملدرآمد تے عام آدمی کوں سہولتاں ݙیوݨ یقینی بݨایا ویسی ۔ وزیر اعظم دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت اچ وفاقی کابینہ دا اجلاس تھیا ۔وفاقی کابینہ گزریل ݙینھ بلوچستان اچ دہشت گردی دے واقعات تے دہشت گرداں دے نہتے شہریاں تے بزدلانہ حملیں دی شدید مذمت کیتی ۔ کابینہ انھاں واقعات اچ شہید تھیوݨ آلے سکیورٹی فورسز دے افسراں تے اہلکاراں اتے نہتے شہریاں سانڳے مغفرت دی دعا منڳی ۔ کابینہ انھاں واقعات اچ ملوث دہشت گرداں دی وختی نشاندہی کرتے انھاں دے خلاف بھرپور کارروائی کرݨ دی ہدایت کیتی ۔ وزیراعظم وزیر خزانہ، وزیر قومی غذائی تحفظ، وزیر توانائی اتے متعلقہ وزراء و افسراں دی آندی ربیع فصل سانڳے یوریا کھاد دی بلا تعطل ݙیوݨ سانڳے چاتے ڳئے فیصلیں دی حوصلہ افزائی کیتی ۔آندی ربیع فصل سانڳے یوریا کھاد دے کارخانیں کوں بلا تعطل گیس ݙیوݨ نال یوریا دی درآمد کوں روک تے قومی خزانے دے 130 ملین ڈالر دی بچت کیتی ڳئی ۔ وزیراعظم آکھیے ملک دے وسیع مفاد اچ سارے وزراء و اداریں کوں جتھاں وی ممکن ہووے قوم دی ھک ھک پائی بچاوݨ سانڳے ایجھے چنڳے فیصلے کرݨے چاہیدن ۔ وفاقی کابینہ اچ وزارت ہاؤسنگ اینڈ ورکس دی سفارشات تے پاک پی ڈبلیو ڈی دی تحلیل، سٹاف اتے جاری منصوبیں دی ٻئی وزارتاں تے اداریں اچ منتقلی دے حوالے نال تجویزاں پیش کیتیاں ڳئن ۔ اجلاس اچ ݙسایا ڳئے وزیراعظم دی ہدایت تے پی ڈبلیو ڈی دے تحت جاری ترقیاتی و سرکاری شعبہ دے ترقیاتی پروگرام دے منصوبیں تے بلا تعطل کم جاری رکھݨ سانڳے تے ضروری مینٹینس سٹاف اتے انکوائریز کوں متعلقہ وزارتاں اتے صوبائی حکومتاں دے حوالے کیتا ویندا پئے۔ ایں حوالے نال وفاقی کابینہ وزارت ہاؤسنگ اینڈ ورکس دی سفارشات دی منظوری ݙے ݙتی۔ وزیراعظم آکھیے ملک اچ گورننس دی بہتری اتے ادارہ جاتی اصلاحات سانڳے ترجیحی بنیاداں تے اقدامات چیندے پیوں ،ملک دے نظام کوں جدید خطوط تے ٹورݨ تے بین الاقوامی تقاضیں نال جوڑݨ سانڳے اداریں دی ڈیجیٹائزیشن اتے سمارٹ مینجمنٹ متعارف کرویندے پیوں ۔ وفاقی کابینہ کوں وزیر خزانہ دی سربراہی اچ بݨی ادارہ جاتی اصلاحات سانڳے بݨائی ڳئی کمیٹی دیاں تجویزاں پیش کیتیاں ڳئن ۔ کابینہ کوں ݙسایا ڳئے وفاقی حکومت دی کارکردگی چنڳی بݨاوݨ ، افرادی قوت دے صحیح استعمال، پالیسی سازی اتے فیصلیں دے نفاذ اچ غیر ضروری تعطل ختم کرݨ تے صرف ٻہوں ضروری محکمیں کوں تکڑا کرݨ سانڳے پہلے مرحلے اچ 6 وزارتاں تے کمیٹی دی سفارشات دا نفاذ شروع کرݙتا ڳئے ۔اجلاس کوں ݙسایا ڳئے کمیٹی دی سفارشات دی روشنی اچ انھاں وزارتاں دے 82 سرکاری اداریں کوں ضم اتے تحلیل کرتے 40 ایجھے اداریں اچ بدالیا ویندا پئے جنھاں اچ ڈیجیٹائزیشن،سمارٹ مینجمنٹ، ایفیشینٹ گورننس، منصوبیں تے شفاف اتے تکھے عملدرآمد تے عام آدمی کوں چنڳیاں سہولتاں ݙیوݨ یقینی بݨایا ویسی ۔ وفاقی کابینہ کمیٹی دی سفارشات دی منظوری ݙیندے اداریں کوں ضم و تحلیل کرݨ نال متوقع طورتے متاثر تھیوݨ آلے ملازمین دے مفادات دا تحفظ یقینی بݨاوݨ سانڳے کمیٹی بݨاݙتی ۔ وفاقی کابینہ کوں وزیراعظم دے حکومتی خرچے گھٹ کرݨ دے وژن تے ہدایات دے تحت جاری کفایت شعاری مہم تے پیشرفت اتے اقدامات دے نفاذ تے تفصیلی بریفنگ ݙتی ڳئی۔وفاقی کابینہ گزریل دور حکومت اچ وزیراعظم شہباز شریف دی قیادت اچ کابینہ دی طرفوں منظور شدہ کفایت شعاری مہم دے اقدامات جاری رکھݨ دی منظوری ݙتی ۔ انھاں اقدامات اچ کابینہ ارکان دا رضاکارانہ طور تے تنخواہ نہ گھنݨ، ٻہوں ضروری گاݙیاں مثلاً ایمبولینسز دے علاوہ سرکاری گاݙیاں مل گھنݨ تے پابندی، نویں آلات و مشینری مل گھنݨ تے پابندی، نویں سرکاری آسامیاں دی تخلیق، سرکاری خرچے تےغیر ضروری ٻاہرلے ملک سفر تے ٻاہرلے ملک علاج تے پابندی شامل ہن۔انہاں آکھیے ملک ایں ڳالھ دا متحمل نی تھی سڳدا جو افسر شاہی اتے اشرافیہ غریب عوام دے ٹیکس تے عیش کرن۔وزیراعظم آکھیے آپݨے خون دے چھیکڑی قطرے تئیں غریب عوام دی ھک ھک پائی دی جتھاں تئیں ممکن تھی سڳیا حفاظت کریساں ، وزراء اے ڳالھ یقینی بݨاون جو متعلقہ وزارتاں اتے اداریں اچ کفایت شعاری مہم دے اقدامات تے بھرپورعملدرآمد جاری رہسی ۔وزیراعظم آکھیے کفایت شعاری مہم دے اقدامات تے عملدرآمد یقینی بݨاوݨ اچ وزارء اتے افسراں دیاں کوششاں چنڳیاں ہن ۔وفاقی کابینہ اقتصادی رابطہ کمیٹی دے 22 اگست 2024 کوں تھیوݨ آلے اجلاس اچ کیتے ڳئے فیصیں دی توثیق کرݙتی
