اسلام آباد۔21جون (اے پی پی):موسمیاتی تبدیلی دی وزیر مملکت زرتاج گل آکھیے جو وزیراعظم عمران خان دے وژن دے مطابق ملکی تاریخ اچ پہلی واری موسمیاتی تبدیلیاں نال نبݨݨ کیتے 14 ارب روپے توں ودھ دے فنڈز مختص کیتے ڳئن ،عمران خان ووٹ بنک اتے الیکشن دا نی بلکہ آندیاں نسلاں دا سوچیندن ، جنھاں دے لیڈر بھڳوڑے بݨ تے لندن ویندن او اوورسیز پاکستانیاں کوں ووٹ دا حق ݙیوݨ دی مخالفت کریندے پئن ۔ سنوار کوں قومی اسمبلی اچ بجٹ تے بحث اچ حصہ گھندے ہوئیں وزیر مملکت آکھیے اساں او پاکستان ݙٹھے جݙاں آکھیا ویندا ہئی جو یا اساݙے رلے تھیوو نتاں اساݙے خلاف تھی ڳئے ، اساں او پاکستان وی ݙٹھے جو پاکستانی وزیراعظم امریکی عہدیداراں نال ملاقاتاں کیتے قطاراں اچ ہوندے ہن۔ اساں او وزیراعظم وی ݙٹھے جیڑھا امریکیاں کوں آکھدے ہن ڈرون حملے کرو اساں مذمت کریندے رہسوں ، میکوں فخر اے جو میں ایں وزیراعظم دی کابینہ اچ رلی ودی ہاں جیں 9 سال پہلے ڈرون حملیں دے خلاف وزیرستان تئیں مارچ کیتا۔
