اسلام آباد۔31دسمبر(اے پی پی) وفاقی وزیر صحت عبدالقادر پٹیل نال چیئرمین ہایئر ایجوکیشن کمیشن (ایچ ای سی) ملاقات کیتی اے ۔ ترجمان وزارت صحت موجب ملاقات اچ میڈیکل دی تعلیم کوں بین الاقوامی معیار دے مطابق بݨاوݨ کیتے پختہ عزم دا اظہار کیتا ڳئے ۔ وفاقی وزیر صحت عبدالقادر پٹیل ایں موقع تے آکھیے جو شہید ذوالفقارعلی بھٹو یونیورسٹی اسلام آباد اچ اعلی سطح دی یونیورسٹی اے۔ یونیورسٹی کجھ سالاں اچ چنڳاں مقام ڳھدے ۔ انہاں مزید آکھیے گزریل ݙو سال اچ یونیورسٹی ݙاہ نویں پروگرام شروع کیتے جݙاں جو یونیورسٹی دے مجموعی طور تے 45 دے نیڑے مختلف پروگرام چلدے پئن ۔ عبدالقادر پٹیل آکھیے جو یونیورسٹی بیسک سائنس اچ ایم فل اتے پی ایچ ڈی پروگرام وی شروع کیتے ۔ انہاں آکھیے ایچ ای سی دی سپورٹ دے خصوصی طور تے شکر گزار ہیسے۔ وفاقی وزیر آکھیے یونیورسٹی دی توسیع کیتے زمین وی درکار اے تاں جو ݙوجھے وݙے پروگرام شروع کیتے ونڄ سڳن ۔ یونیورسٹی دی زمین کیتے این آئی ایچ توں زمین ڳھدی ویسی ۔ عبدالقادر پٹیل آکھیے ایچ ای سی اساکوں کلینکل سائنسز اچ اعلی تعلیم دے معیار کوں اچا کرݨ کیتے سپورٹ ݙیوے ۔ ملاقات اچ چیئرمین ایچ ای سی اعلی تعلیم دے معیار کوں بہتر بݨاوݨ کیتے ہر قسم دے بھرپور تعاون دا یقین ݙیوایا۔
