اقوام متحدہ۔1دسمبر(اے پی پی):پاکستان فلسطینی عوام دے نال یکجہتی دا اظہار کریندے ہوئیں اسرائیل فلسطین جھیڑے دے پرامن حل کیتے ایجھے مذاکرات تے زورݙتے جیں توں فلسطینی علاقیں تے اسرائیلی قبضے دا خاتمہ ہووے تے ھک آزاد فلسطینی ریاست دے قیام دا رستہ ہموار تھی سڳے جیئں دا دارالحکومت القدس الشریف ہووے۔ اقوام متحدہ اچ پاکستان دے نائب مستقل نمائندے عامر خان جنرل اسمبلی اچ فلسطین دی صورتحال تے بحث دے دوران آکھیے جو اسرائیل دے مسلسل قبضے دی صورت اچ مقبوضہ بیت المقدس دی مقدس سرزمین تے امن قائم نہ تھیسی ۔ انہاں آکھیے جے تاریخ توں رہنمائی ڳھدی ونڄے تاں اے ڳالھ ثابت تھیندی اے جو اسرائیل دے ہتھوں بے دخل اتے بے اختیار فلسطینیاں دی ہر آوݨ آلی نسل اپݨی آزادی اتے بنیادی حقوق سودھے اپݨے حق خود ارادیت دے حصول کیتے جدوجہد جاری رکھیسی ۔ پاکستانی مندوب آکھیے جو غیر قانونی وستیاں دی تعمیر،فلسطینیاں دے گھراں دی مسماری اتے انہاں دی بے دخلی جیہے یکطرفہ اسرائیلی اقدامات انسانی حقوق دے بین الاقوامی قانون دی سنگین خلاف ورزیاں ہن جیڑھے جو امن دے قیام دیاں امیداں کوں متاثر کریندیاں پئن۔
