اسلام آباد۔1اگست (اے پی پی) وفاقی وزیر اطلاعات تے نشریات مریم اورنگزیب آکھیا جو حکومت پٹرولیم مصنوعات بارے ذمہ دارانہ فیصلہ کیتے، اساں آئی ایم ایف نال معاہدے کوں نبھائے، عمران خان وانڳوں وعدہ خلافی نی کیتی، حکومت دی مد کجھ ݙینھ اچ مُکدی پئی اے، اساں سیاسی فائدے دی بجائے ملک دی معیشت دے استحکام کوں ݙٹھے، عمران خان کوں جݙاں یقین ہئی جو انہاں دی حکومت مُکدی پئی اے تاں اوں سیاسی فائدے کیتے پٹرولیم مصنوعات تے سبسڈی ݙے تے آئی ایم ایف دے معاہدے دی خلاف ورزی کیتی۔ منگل کوں ڈائریکٹوریٹ آف الیکٹرانک میڈیا اینڈ پبلی کیشنز اچ فارن میڈیا ڈیجیٹل مانیٹرنگ وال دے افتتاح دے موقع تے میڈیا نال ڳالھ مہاڑ کریندیں ہوئیں انہاں آکھیا جو 15 مہینے پہلے وزارت اطلاعات اچ آئی ٹی ٹرانسفارمیشن شروع کیتی ڳئی، پی ٹی وی دے اندر آئی ٹی اپ گریڈیشن، ورچوئل سٹوڈیوز، پی ٹی وی فلکس اتے ڈیجیٹلائزیشن دا عمل پورا تھی ڳئے۔ ریڈیو پاکستان دا پورا آرکائیو ڈیجیٹلائز تھی ڳئے اتے ریڈیو پاکستان اچ چار ارب روپے دا پراجیکٹ شروع کیتا ویندا پئے۔ انہاں آکھیا جو ڈیجیٹل ریڈیو منڈیال ٹیکنالوجی دے ذریعے ریڈیو دی نشریات شارٹ ویو اتے اینا لاگ توں میڈیم ویو تے منتقل تھی ویسن۔ ایں جدید ٹیکنالوجی نال ریڈیو پاکستان دی نشریات 52 ملکاں اچ سݨی ویسن۔ فارن میڈیا ڈیجیٹل مانیٹرنگ وال توں عالمی حالات حاضرہ بارے آگاہی ملسی جڈانجو 90 مقامی اتے 35 عالمی میڈیا چینلز، 15 روزنامہ اخبارات، 500 توں ودھ ٹویٹر ہینڈلز، 500 توں فیس بک پیجز، 200 توں ودھ یو ٹیوب چینلز اتے 200 توں ودھ انسٹا گرام اتے ڈیجیٹل پلیٹ فارمز دی مانیٹرنگ تھیسی۔ ایں توں پہلے وفاقی وزیر اطلاعات ڈائریکٹوریٹ آف الیکٹرانک میڈیا اینڈ پبلی کیشنز اچ فارن میڈیا ڈیجیٹل مانیٹرنگ وال دا افتتاح کیتا۔ ایں موقع تے وفاقی سیکریٹری اطلاعات سہیل علی خان اتے وزارت دے ٻئے سینئر حکام وی موجود ہن۔
