اسلام آباد۔8ستمبر(اے پی پی):سپریم کورٹ مبینہ آڈیو لیکس کیس دا محفوظ فیصلہ سݨیندے ہوئیں پی ڈی ایم دی گزریل اتحادی حکومت دا کیس دی سماعت کرݨ آلے بنچ اچ شامل ججاں تے کیتے ڳئے اعتراض کوں مسترد کریندے ہوئیں قرار ݙتے جو ججاں تے اعتراض عدلیہ دی آزادی تے حملہ اے۔ جسٹس اعجاز الااحسن محفوظ کیتا ڳیا مختصر فیصلہ سݨایا۔ واضح رہے جو پی ڈی ایم دی حکومت اڄوکے سال جون اچ چیف جسٹس عمر عطاء بندیال دی خوشدامن، سپریم کورٹ دے جج جسٹس سید مظاہر علی اکبر نقوی، سپریم کورٹ بار ایسوسی ایشن دے صدر عابد زبیری اتے سابق وزیر اعلی پنجاب چوہدری پرویز الٰہی وچال تھیوݨ آلی ڳالھ مہاڑ دی مبینہ آڈیو لیک تھیوݨ تے نامزد چیف جسٹس، جسٹس قاضی فائز عیسی دی سربراہی اچ ھک جوڈیشل کمیشن تشکیل ݙتا ہئی ۔ سپریم کورٹ بار ایسوسی ایشن دے صدر عابد زبیری جوڈیشل کمیشن کوں چیلنج کیتا ہئی ۔ جیں دے بعد چیف جسٹس عمر عطاء بندیال دی سربراہی اچ پنج رکنی لارجر بینچ تشکیل ݙتا ڳیا ہئی جیں کیس دی سماعت کیتی۔ سماعت اچ پی ڈی ایم دی اتحادی حکومت دی طرفوں بینچ اچ شامل چیف جسٹس عمر عطاء بندیال، جسٹس اعجاز الاحسن اتے جسٹس منیب اخترتے اعتراض چیندے ہوئیں استدعا کیتی ڳئی ہئی جو او اے درخواست نہ سݨن تے خود کوں بنچ توں انڄ کر گھنن ۔ سابق حکومت دے اعتراض تے سپریم کورٹ اپݨے فیصلے کوں محفوظ کر ڳھدا ہئی تے 8 ستمبر 2023ء کوں 32 صفحیں تے مشتمل فیصلہ جسٹس اعجاز الاحسن عدالت اچ سݨائے ۔
