اسلام آباد۔8دسمبر(اے پی پی) حکومت جاپان ، پاکستان انسداد پولیو پروگرام کیتے 3.87 ملین امریکی ڈالر توں ودھ دی گرانٹ ݙیندے ہوئیں آپݨی معاونت ودھا ݙتی اے ، ایں گرانٹ کوں ضروری پولیو ویکسین مل گھنݨ کیتے استعمال کیتا ویسی جیں توں پاکستان اچ وبائی ضلعیں اچ پنج سال توں گھٹ عمر دے 18.61 ملین توں ودھ ٻالاں دی ویکسی نیشن تھیسی ۔حکومت جاپان و یونیسف اتے جاپان انٹرنیشنل کوآپریشن ایجنسی (جائیکا ) و یونیسیف دے درمیان معاہدے تے دستخط تھئے ۔ وفاقی وزیر صحت عبدالقادر پٹیل اتے ٻئیں تقریب اچ شرکت کیتی ۔ پاکستان پولیو پروگرام گزریل 30 سالاں اچ پولیو وائرس توں متاثرہ ٻالاں دی تعداد اچ تاریخی کمی گھن آئی اے ۔ پولیو مکاوݨ کیتے حکومت دے عزم دا تذکرہ کریندے ہوئیں وفاقی وزیر صحت عبدالقادر پٹیل آکھیے جوانسداد پولیو پروگرام کامیابی نال خیبر پختونخوا دے مقامی ضلعیں تئیں وائرس دی گردش کوں محدود کرݙتے ،اساں 2023 ءتئیں پولیو مکاوݨ کیتے پرعزم اتے پر امید ہیسے، انہاں پولیو مکاوݨ کیتے جاپان دی حکومت اتے ڈونرز دےغیر متزلزل عزم دی تعریف کیتی اے ۔حکومت جاپان 1996 ءتوں پاکستان پولیو پروگرام دے نال تعاون دے نتیجے اچ پولیو ویکسین دی ٻالاں تئیں رسائی کوں ممکن بݨیندی پئی اے جیں توں ٻالاں کوں پوری عمر دی معذوری توں بچایا ویندا پئے ، یونیسف دے توسط نال پاکستان اچ پولیو پروگرام کوں سپورٹ کرݨ کیتے حکومت جاپان دی طرفوں ہݨ تئیں 238.66 ملین ڈالر توں ودھ دی گرانٹ اتے قرض دی رقم ݙتی اے ۔جاپان دے سفیر وادا متسوہیرو حکومت پاکستان اتے یونیسف دی جنوبی خیبرپختونخوا اچ ہنگامی ویکسی نیشن مہم اتے شمالی وزیرستان اچ ٹرانزٹ پوائنٹس قائم کرݨ تے انہاں دیاں ودھ ساریاں کوششاں دی تعریف کیتی ۔
