اسلام آباد۔27جون (اے پی پی):وفاقی وزیر اطلاعات و نشریات مریم اورنگزیب آکھیے جو ساݙی زبان ہی ساݙی شناخت اے، جدید دنیا اچ زباناں معدومیت دے پاسے ودھدیاں پئن ، زباناں دے تحفظ کیتے عالمی سطح تے اقدامات لوڑھ اے، اے ڳالھ انہاں سنوار کوں علامہ اقبال اوپن یونیورسٹی دے زیر اہتمام ”لینگوئج ڈاکومنٹیشن” دے موضوع تے چار ݙینھ وار انٹرنیشنل ٹریننگ ورکشاپ دے افتتاحی سیشن توں خطاب کریندے ہوئیں آکھی اے ۔ وفاقی وزیر اطلاعات علامہ اقبال اوپن یونیورسٹی کوں خراج تحسین پیش کریندے ہوئیں آکھیے جو زبان مختلف ثقافتاں تے معاشروں کوں کٹھا کریندن ، زبان دی ڈاکومنٹیشن جہیے اہم موضوع تے تربیتی ورکشاپ دا انعقاد خوش آئند امر اے، اے او موضوع اے جیڑھا ساݙی ثقافت اتے روزانہ دی زندگی اچ ٻہوں گھٹ تھی تے رہ ڳئے ، انہاں آکھیے پاکستان اچ تقریباً 80 زباناں ٻولیاں ویندن جنہوں اچوں 26 زباناں معدومیت ݙے ودھدیاں پئن۔ وفاقی وزیر آکھیے اساݙے وݙے زباناں دی اہمیت توں چنڳی طرح واقف ہن لیکن موجودہ دور اچ ساݙے ٻال انہاں زباناں تے کلچر توں ناواقف ہن ۔ انہاں آکھیے جو ملک توں ٻہر زبان ساݙی ثقافت تے شناخت دی ڈاکومنٹیشن کریندی اے ، ایکوں پاکستان اچ ودھارا تھیوݨاں چاہیدے ۔ وفاقی وزیر اطلاعات آکھیے جوعلامہ اقبال اوپن یونیورسٹی دی اے ورکشاپ ھک ایجھے باب دا آغاز اے جیڑھی جو زبان، کلچر، تاریخ تے معاشرے دی اہمیت کوں اجاگر کریندے ۔ انہاں آکھیے زبان نہ صرف معاشرے، ثقافت، تاریخ کوں آپݨے اندر سمو گھندی اے بلکہ ایں توں ھک ایجھا سماجی تعلق جنم گھندے جیڑھا قوماں دی شناخت دا باعث بݨدے ۔ واضح رہے جو چار ݙینھ وار ورکشاپ دا انعقاد علامہ اقبال اوپن یونیورسٹی دے سینٹر فار لینگوئجز اینڈ ٹرانسلیشن سٹڈیز اینڈ او آر آئی سی یونیورسٹی آف نارتھ ٹیکساس، امریکا تے انگلشرز ایل ایل ایل انٹرنیشنل ترکی دے تعاون توں کیتے ۔ اے ورکشاپ 27 جون توں 30 جون تئیں جاری رہسی ۔ ورکشاپ اچ یونیورسٹی آف نارتھ ٹیکساس امریکہ توں ڈائریکٹر ورکشاپ پروفیسر ڈاکٹر صدف منشی، ایرک انگلرٹ، اورنگزیب تے یونیورسٹی آف کیلیفورنیا توں جوناتھن پیرامور شرکت کریندے پئن۔
