حویلی بہادر شاہ (جھنگ)۔ 07 جولائی (اے پی پی) وزیراعظم محمد نواز شریف آکھیا جو پاکستان اچ ہر شعبہ اچ حقیقی معنیاں اچ انقلاب برپا تھیندا پئے ،پاکستان بدلدا پئے ،او ویلھا پرے کائنی جڈانجو پاکستان ترقی یافتہ ملکاں دی صف اول اچ رل ویسی،ملک تے قوم دی خدمت کر تے آپنڑاں فرض نبھیندے پئیوں۔اساڈے سیاسی مخالفین کوں اےہو تکلیف اے جو پاکستان ترقی دی اچائیاں کوں چھوونڑ ویندا پئے۔اندھیرے مُکدے پئن ،او انتخابی پِڑ اچ اساڈا مقابلہ نی کر سگدے،مسلم لیگ (ن) انتخابی میدان اچ انہاں کوں ولا ولا ہرائے اتے ولا وی ہریسی،او صرف سازشاں کریندن،کڈاہیں دھاندلی دی آڑ اچ ،کڈاہیں دھرنے دی آڑ اچ اتے کڈاہیں احتساب دی آڑ اچ سازش کیتی ویندی اے اتے کڈاہیں او جے آئی ٹی دے پچھوں لُکنڑ دی کوشش کریندن۔انتخابی میدان اچ ہر کراہیں سازش کر نڑ بزدلی اے۔انہاں اے گالھیں جمعہ کوں حویلی بہادر شاہ پاور پلانٹ دے 760 میگاواٹ دے پہلے یونٹ دے افتتاح دے بعد کٹھ نال خطاب کریندیں ہوئیں آکھی۔وزیراعظم تختی دی نقاب کشائی کر تے منصوبہ دا افتتاح کیتا جیڑھا جو 21مہینیاں دی ریکارڈ مدت اچ پورا تھےے۔وزیراعظم پلانٹ دے کنٹرول روم دا وی دورہ کیتا اتے حویلی بہادر شاہ پاورپلانٹ دے سی ای اور راشد محمود لنگڑیال منصوبے بارے بریفنگ ڈتی۔وزیراعظم آکھیا جو اے بہوں خوشی دی گالھ اے جو منصوبہ سنگ بنیاد رکھنڑ دے محض 21مہینیاں دے بعد او اتھاں آ کراہیں افتتاح کریندے پئن ،21مہینیاں پہلے منصوبے دی جاہ تے فصلاں اتے میدان ہن ،انہاں آکھیا جو اتنی مدت اچ تاں ایجھے منصوبیاں دا ہک حصہ بنڑنڑ دی اوکھا اے۔پاکستان اچ منصوبیاں دی تکمیل دی نویں رواےت قائم کریندے پئیوں۔
