اسلام آباد – 24 آگسٽ (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته ڀارت پاڪستان ۾ امن عمل کي سبوتاز ڪرڻ جي ڪوشش ڪري رهيو آهي، ڀارت جو ڪو بارڊر افغانستان سان نه ٿو ملي، ڀارت افغانستان ۾ مداخلت کان پاسو ڪري، پاڪستان سدائين افغان مسئلي جي سياسي حل جي ڳالهه ڪئي، پاڪستان افعانستان ۾ رهندڙ پرڏيهي شهرين جي انخلا ۾ سهولت ڏني، قومي ايئرلائين هيستائين ڪابل مان 1500 ماڻهن جي انخلا کي يقيني بڻايو، جتي فوج نه هجي ۽ ادارا مضبوط نه هجن اهو ملڪ نه ٿو هلي سگهي، پنهنجي ساڄي کاٻي پاسي ڏسي وٺو، جتي ملڪ محفوظ نه آهي اتي گهر به محفوظ نه آهي، حڪومت ملڪ ۾ شفاف چونڊون منعقد ڪرڻ جي لاءِ قدم کڻي رهي آهي، پاڪستان ۾ هڪ به اليڪشن اهڙي نه آهي جنهن ۾ مخالف ڌر شفاف طريقي سان کٽي هجي، 90 لک اوورسيز پاڪستانين کي ووٽ جي حق کان روڪڻ جي ڪوشش ڪئي پئي وڃي، ڌانڌلي روڪڻ جي لاءِ جوڊيشل ڪميشن جي 36 سفارشن مان اڪثر جو حل اي وي ايم سان ممڪن آهي، اسان ٻاهرئين ملڪ رهندڙ پاڪستانين کي ووٽ جو حق ڏيڻ جي لاءِ ڪوششون ڪري رهيا آهيون، اوورسيز پاڪستانين جي پرڏيهي ناڻي جي ڪري ملڪي معيشت مستحڪم ٿي رهي آهي، ڪورونا وبا جي ڦهلاءُ جي ڪري خيبرپختونخواهه ۽ پنجاب جي صحت جي شعبن تي اضافي دٻاءُ آهي، معاشي انگ اکر مستحڪم آهن، روانگي واپار ۾ اضافو جڏهن ته مهانگائي ۾ گهٽتائي اچي رهي آهي، بزنس انڊيڪس ۾ به 108 سيڪڙو نمايان اضافو رڪارڊ ٿيو، ڊاڪٽر محمد اشفاق کي ايف بي آر جو نئون چيئرمين جڏهن ته ڊاڪٽر نديم ظفر کي پاڪستان شماريات بابت اداري جو سربراهه مقرر ڪيو ويو آهي. اهڙن خيالن جو اظهار هن وزيراعظم عمران خان جي صدارت ۾ وفاقي ڪابينا جي اجلاس کانپوءِ صحافين کي بريفنگ ڏيندي ڪيو. اطلاعات واري وفاقي وزير چوڌري فواد حسين چيو ته وفاقي ڪابينا جي اجلاس ۾ پرڏيهي وزير شاهه محمود قريشي افغانستان جي صورتحال تي بريفنگ ڏني. هن چيو ته اسان جي افغانستان جي موجوده صورتحال تي گهري نظر آهي. پاڪستان افعانستان مان پرڏيهي ماڻهن جي انخلا ۾ اهم ڪردار ادا ڪري رهيو آهي، هن وقت اسان مختلف ملڪن جي هزارين ماڻهن کي افغانستان مان نڪرڻ ۾ سهولت فراهم ڪئي، 3500 کان وڌيڪ ماڻهن کي هوائي جهاز ذريعي جڏهن ته 19 هزار ماڻهن کي بارڊر جي ذريعي نڪرڻ ۾ مدد ڏني. ان پوري عمل ۾ پاڪستان سڀ کان اهم ڌر آهي. هن چيو ته پاڪستان انٽرنيشنل ايئرلائين 1500 کان وڌيڪ ماڻهن کي ڪڍڻ ۾ سهولت ڏني، هن وقت اسان پرڏيهي شهرين جي لاءِ پنهنجا بارڊرز کولڻ جي ڪوشش ڪري رهيا آهيون. پاڪستان هن وقت پنهنجون فضائي ۽ زميني سرحدون ڪابل ۾ ڦاٿل پرڏيهي شهرين جي لاءِ کوليون آهن. اطلاعات واري وفاقي وزير چيو ته جيستائين افغانستان ۾ حڪومت سازي جو عمل آهي، ان ۾ اسان ذميواراڻو ڪردار ادا ڪري رهيا آهيون، اسان جو ترڪيءَ، چين ۽ ٻين ملڪن سان ويجهو رابطو آهي. هن چيو ته اسان افغانستان ۾ مسلسل سياسي حل جي ڳالهه ڪري رهيا هئاسين، جيڪڏهن پاڪستان جي ايڊوائس تي عمل ٿئي ها ته اڄ افغانستان ۾ اهڙي قسم جي صورتحال نه هجي ها. اطلاعات واري وفاقي وزير ٻڌايو ته وفاقي ڪابينا ان ڳالهه تي زور ڏنو آهي ته ڀارت افغانستان جي اندر مداخلت کان پاسو ڪري، ڀارت جو افغانستان سان گڏ ڪو بارڊر نه آهي. هن چيو ته افغانستان ۾ گذريل حڪومت دوران ڀارت افغانستان جي سرزمين کي پاڪستان جي خلاف استعمال ڪيو، ڀارتي ميڊيا هن وقت به افغانستان ۾ امن جي عمل کي سبوتاز ڪرڻ جي ڪوششن ۾ مصروف آهي. هن چيو ته انهن معاملن سان ڀارت جو ڪو تعلق نه آهي، ان جو ڪو بارڊر افغانستان سان نه ٿو ملي، ڀارت کي افغانستان جي معاملن ۾ دخل اندازي جي ضرورت نه آهي، ان کي انهن معاملن کان پري رهڻ گهرجي. هن چيو ته پاڪستان امن عمل جو اهم حصيدار آهي، اسان نه ٿا چاهيون ته ڪو ٻيو ملڪ بشمول ڀارت امن جي عمل کي سبوتاز ڪري. اطلاعات واري وفاقي وزير ٻڌايو ته وفاقي ڪابينا جي اجلاس ۾ سائنس ۽ ٽيڪنالاجي واري وفاقي وزير سينيٽر شبلي فراز ۽ وزيراعظم جي پارلياماني معاملن واري صلاحڪار ڊاڪٽر بابر اعواڻ اليڪٽرانڪ ووٽنگ مشين ۽ ٻاهرئين ملڪ پاڪستانين جي لاءِ آئي ووٽنگ تي بريفنگ ڏني. هن چيو ته اڄ تائين ڪا اهڙي اليڪشن ناهي ٿي جنهن ۾ مخالف ڌر شفاف طريقي سان کٽي هجي. هن چيو ته مخالف ڌر جي پوري ڪوشش آهي ته اڳوڻو نظام برقرار رهي، اهي 90 لک اوورسيز پاڪستانين کي ووٽ جي آئيني حق کان محروم ڪرڻ جي ڪوشش ڪري رهيا آهن. اطلاعات واري وفاقي وزير ٻڌايو ته وفاقي ڪابينا مخالف ڌر جي ان رويي جي مذمت ڪئي آهي. هن چيو ته پاڪستان تحريڪ انصاف ڌانڌلي جي خلاف جڏهن چار تڪ کولڻ جي لاءِ ڌرڻو ڏنو هو، ان کانپوءِ احترام لائق اڳوڻي چيف جسٽس جي سربراهي ۾ جوڊيشل ڪميشن قائم ٿي، ان جوڊيشل ڪميشن 36 سفارشون پيش ڪيون جن مان اڪثر سفارشن جو حل اي وي ايم آهي. هن چيو ته اسان جيڪي سڌارا آڻي رهيا آهيون، جوڊيشل ڪميشن جي سفارشن ۽ انهن سڌارن جو لازمي حصو آهي. هن چيو ته ڪابينا آئي ووٽنگ جي نظام تي نادرا کي هدايت ڪئي آهي اها ان معاملي کي جلد کان جلد اڪلائي. اطلاعات واري وفاقي وزير چيو ته اوورسيز پاڪستانين جي پرڏيهي ناڻي جي ڪري ملڪي معيشت مستحڪم ٿي رهي آهي، اوورسيز پاڪستانين جو وڏو انگ وزيراعظم عمران خان جي قيادت تي اعتماد ڪري ٿو ۽ سڄي دنيا مان مٽاسٽا جو ناڻو پاڪستان اچي رهيو آهي. چوڌري فواد حسين ٻڌايو ته وفاقي ڪابينا کي ڪورونا جي حوالي سان پڻ بريفنگ ڏني وئي آهي. هن وقت خيبرپختونخواهه ۽ پنجاب ۾ اسپتالن تي بار ۾ اضافو ٿيو آهي، موجوده صلاحيتن موجب 70 سيڪڙو آڪسيجن استعمال ٿي رهي آهي، جيڪڏهن صورتحال بهتر نه ٿي ته صنعتن کي آڪسيجن جي سپلائي گهٽ ڪرڻي پوندي ته جيئن مريضن کي آڪسيجن جي فراهمي جاري رکي سگهجي. هن چيو ته خيبرپختونخواهه ۽ پنجاب ۾ اسپتالن تي مريضن جي بار ۾ اضافو ٿيو آهي، انهن معاملن کي ڪنٽرول ڪرڻ جي ضرورت آهي ته جيئن صورتحال وڌيڪ خراب نه ٿئي. اطلاعات واري وفاقي وزير چيو ته ڪابينا جي اجلاس ۾ عورتن بابت واقعن تي پڻ ڳالهه ٿي، وزيراعظم عمران خان اجلاس کي خطاب ڪندي چيو ته مينار پاڪستان جهڙا واقعا معاشري جي هر طبقي جي لاءِ ڳڻتي جوڳا آهن. ٽڪ ٽاڪ جهڙن رجحانن جي خلاف معاشري ۾ هڪ ردعمل اچي رهيو آهي. وڌندڙ جنسي ڏوهن ۽ ٻين غيراخلاقي رجحانن کي روڪڻ جي لاءِ ضروري آهي ته ان حوالي سان بحث شروع ڪيو وڃي. هن چيو ته ان صورتحال جو جائزو وٺڻ ۽ ان کي منهن ڏيڻ جي لاءِ سفارشون جوڙڻ جي لاءِ هڪ اعليٰ سطحي ڪميٽي جوڙي پئي وڃي جنهن ۾ ناليوارا عالم سڳورا، دانشور ۽ سول سوسائٽي جا نمائندا شامل هوندا. هن ٻڌايو ته وفاقي ڪابينا ڊاڪٽر محمد اشفاق کي ايف بي آر جو نئون چيئرمين مقرر ڪرڻ جي منظوري ڏني، ڊاڪٽر احمد مجتبيٰ کي انٽيليڪچوئل پراپرٽي آرگنائيزيشن آف پاڪستان جي چيئرمين جي مقرري تائين ان عهدي جي اضافي چارج ڏيڻ جي منظوري ڏني. ڪابينا عديله خان کي عورتن بابت نيشنل ڪميشن اسلام آباد (ڪيپيٽل ٽيريٽري بابت) جي ميمبر مقرري جي پڻ منظوري ڏني. ان کانسواءِ وفاقي ڪابينا 37 نئين دوائن جون قيمتون مقرر ڪرڻ جي پڻ منظوري ڏني. هن ٻڌايو ته 12 اهڙيون دوائون آهن جيڪي پاڪستان ۾ موجود هيون، انهن جي قيمت ۾ ڦيرڦار ڪئي وئي آهي. چوڌري فواد حسين ٻڌايو ته ڪابينا پاڪستان اسٽيٽ آئل ڪمپني جي بورڊ آف ڊائريڪٽرز ۾ پاور ڊويزن جي نمائندگي کي يقيني بڻائڻ جي لاءِ ان تجويز کي منظور ڪيو ته سيڪريٽري پاور ڊويزن جو نمائندو جيڪو گريڊ 20 کان گهٽ نه هجي، کي بطور ميمبر شامل ڪيو ويندو. ان کانسواءِ ڪابينا ڊاڪٽر نديم ظفر کي پاڪستان شماريات بابت اداري جو سربراهه مقرر ڪرڻ جي منظوري ڏني آهي. اها اهم جڳهه آهي، ان تي مقرري ٽن سالن کان التوا هيٺ هئي. هن ٻڌايو ته وفاقي ڪابينا ملڪ جي گردواري واري نظام کي ڊيجيٽل ڪرڻ جي عمل جي ذميواري سائنس ۽ ٽيڪنالاجي واري وزارت کان انفارميشن ٽيڪنالاجي ۽ ٽيلي ڪميونيڪشن واري وزارت ۽ نيشنل فوڊ سيڪيورٽي اينڊ ريسرچ واري وزارت کي ڏيڻ جي تجويز جي منظوري ڏني آهي. هن ٻڌايو ته انڊس واٽرز بابت پاڪستان ڪمشنر جي لاءِ مناسب اميدوار جي چونڊ ۾ پيش ايندڙ مسئلن ۽ مختلف سببن جو جائزو وٺڻ جي لاءِ قائم ڪميٽي جون سفارشون ڪابينا آڏو پيش ڪيون ويون، ڪابينا انهن سفارشن جي منظوري ڏئي ڇڏي آهي. اطلاعات واري وفاقي وزير چيو ته ڪابينا ميمبر (فنانس) آئل اينڊ گئس ريگيوليٽري اٿارٽي جي حوالي سان اشتهار جي منظوري سان گڏوگڏ ڊائريڪٽر جنرل (آئل) عمران احمد کي سليڪشن ڪميٽي ۾ شامل ڪرڻ ۽ ان جاءِ جي لاءِ ايم پي اسڪيل اختيار ڪرڻ جي منظوري ڏني. ڪابينا اقتصادي رابطا ڪميٽي جي 16 آگسٽ 2021ع جي اجلاس ۾ ڪيل فيصلن جي توثيق ڪئي. انهن فيصلن ۾ برآمداتي شعبن کي رعايتي اگهن تي بجلي ۽ آر ايل اين جي فراهم ڪرڻ جهڙن معاملن تي فيصلا شامل هئا. اهو ان لاءِ ضروري هو ته ٽيڪسٽائيل جهڙي برآمدي سيڪٽر بابت ڪاروباري برادري جو اعتماد ٿي سگهي، ان سان گڏوگڏ ان ڳالهه کي به يقيني بڻايو وڃي ته حڪومت پاران ڏني ويندڙ رعايت جو غلط استعمال نه ٿي سگهي. هن چيو ته وفاقي ڪابينا کي موجوده معاشي انگن اکرن تي پڻ بريفنگ ڏني وئي. هن چيو ته اسان جا معاشي انگ اکر زبردست آهن، اسان جي روانگي واپار ۾ استحڪام نظر اچي رهيو آهي. ناڻي واڌ ۽ مهانگائي ۾ مسلسل گهٽتائي ڏسڻ ۾ اچي رهي آهي. هن چيو ته مئي ۾ ناڻي واڌ 10.9 سيڪڙو، جون ۾ 9.7 سيڪڙو جڏهن ته جولاءِ ۾ 8.4 سيڪڙو رهيو. ايس پي آئي مئي ۾ 16.9 سيڪڙو، جون ۾ 15.4 سيڪڙو جڏهن ته جولاءِ ۾ 12.6 سيڪڙو رهيو. ان حساب سان ان ۾ اٽڪل چار سيڪڙو گهٽتائي ٿي آهي. هن چيو ته عالمي سطح تي ڪموڊيٽي پرائس تمام گهڻي مٿي وئي آهي، کاڄرو تيل، اسٽيل ۽ ٻين شين جي قيمتن ۾ وڌيڪ اضافو ٿيو آهي پر پاڪستان ۾ قيمتن ۾ گهٽتائي جي حوالي سان مثبت رجحان ڏسڻ ۾ آيو آهي. هن ٻڌايو ته ڊيٽ ٽو جي ڊي پي جي شرح ۾ مسلسل گهٽتائي اچي رهي آهي جيڪا انتهائي حوصلي جوڳي آهي، ٻاهرئين ملڪ سيڙپڪارن جي اعتماد ۾ 108 سيڪڙو اضافو ٿيو آهي. هن ٻڌايو ته پرڏيهي سيڙپڪاري ۾ به استحڪام نظر اچي رهيو آهي جڏهن ته مجموعي طور تي لارج اسڪيل مينوفيڪچرنگ ۾ 14 سيڪڙو اضافو رڪارڊ ڪيو ويو آهي. هن ٻڌايو ته ڪابينا اليڪشن آرڊيننس (ٽئين ترميم) جي منظوري ڏني آهي، اهو اهم آرڊيننس التوا هيٺ هو، ان آرڊيننس تحت جن ماڻهن 60 ڏينهن جي اندر پنهنجي عهدن جو حلف نه کنيو، ته انهن جي ميمبرشپ ختم ٿي ويندي. ڪابينا ان آرڊيننس کي جاري ڪرڻ جي منظوري ڏني آهي. اهڙن سمورن ماڻهن جن پنهنجي عهدن جو حلف ناهي کنيو، هن آرڊيننس جي منظوري کانپوءِ اهي پنهنجي سيٽ وڃائي ڇڏيندا. هڪ سوال جي جواب ۾ اطلاعات واري وفاقي وزير چيو ته ڊگهي عرصي کانپوءِ پهريون ڀيرو ڀارت مان ٽي ٽي پي کي فنڊنگ جو سلسلو رڪجي ويو آهي، جيستائين پاڪستان جي اندر انهن جي ڪارروائي جو تعلق آهي، پاڪستان ڪمزور ملڪ نه آهي، اسان انهن چئلينجن کي منهن ڏيڻ جي ڀرپور صلاحيت رکون ٿا. هن چيو ته افغان عملدارن پنهنجي سرزمين ڪنهن ٻئي ملڪ جي خلاف دهشتگردي جي لاءِ استعمال نه ٿيڻ جو اعلان ڪيو آهي جيڪو خوش آئنده آهي، اميد آهي افغان عملدار ان اعلان تي عملدرآمد پڻ ڪندا. هن چيو ته پاڪستان کي گهربل بي ايل اي ۽ ٽي ٽي پي جي دهشتگردن بابت افغانستان تعاون ڪندو. هڪ سوال جي جواب ۾ اطلاعات واري وفاقي وزير چيو ته پي ڊي ايم جو مستقبل اهو ئي آهي ته اهي لنڊن ۾ شاديون ڪرائيندا، لنڊن ۾ ئي وڌيڪ فليٽس خريد ڪندا، هاڻي ڏسون ٿا ته مولانا فضل الرحمان ڪڏهن لنڊن مبارڪباد ڏيڻ وڃي ٿو. هڪ سوال تي هن چيو ته آمريڪا جي پرڏيهي سيڪريٽري بلنڪن ۽ پرڏيهي وزير شاهه محمود قريشي سان ٽي ڀيرا ڳالهه ٻولهه ٿي چڪي اهي، آمريڪن سينٽرل ڪمانڊ جي چيف، پينٽاگان ۽ ڊفينس ڊپارٽمينٽ سان ويجهي مشاورت جاري آهي. هن ٻڌايو ته هن وقت ٻه ٽريڪ هلي رهيا آهن جن ۾ ترڪي، ايران ۽ وچ ايشيائي رياستون شامل آهن، پاڪستان ان جو حصو آهي، ان کانسواءِ دوحا ۾ هڪ اسٽينڊرڊ ڊائيلاگ هلي رهيو آهي جنهن ۾ چين، پاڪستان، روس ۽ آمريڪا شامل آهي. هن چيو ته ان ريجن جي فيصلن ۾ پاڪستان جي مرضي ۽ ايڊوائس شامل هوندي. هن چيو ته پاڪستان جيڪي ڳالهيون اڳ ۾ ڪيون اهي صحيح ثابت ٿيون آهن. هن چيو ته افغانستان ۾ صورتحال ڏسو، جتي فوج ۽ ادارا مضبوط نه هوندا، ملڪ نه ٿو هلي سگهي، جيترو اسان کي پنهنجو گهر عزيز آهي ايترو ئي ملڪ عزيز هجڻ گهرجي، پنهنجي ساڄي کاٻي پاسي ڏسي وٺو جتي ملڪ محفوظ نه آهي اتي گهر به محفوظ نه آهي.
