اسلام آباد۔13 ستمبر (اے پی پی) چیف آف آرمی سٹاف فیلڈ مارشل سید عاصم منیر نشان امتیاز (ملٹری)، ہلال جرات قصور سیکٹر اتے جلال پور پیر والا ملتان وچ فلڈ ریلیف کیمپس دا دورہ کیتا ، انہاں چھل دی موجودہ صورتحال اتے جاری امدادی سرگرمیاں دا جائزہ ڳھدا ۔ پاک فوج دے شعبہ تعلقات عامہ (آئی ایس پی آر) توں جاری پریس ریلیز موجب ، آرمی چیف دا قصور اتے ملتان دے چھل توں متاثرہ علاقیں دا دورہ سول انتظامیہ اتے فوج دے وچکار ہم آہنگی ودھاوݨ تے مرکوز ہئی تاں جو متاثرہ آبادی کیتے موثر امداد کوں یقینی بݨایا ونڄ سڳے ۔ ایں موقع تے چیف سیکرٹری پنجاب اتے سول انتظامیہ دے ٻئے اعلیٰ حکام وی موجود ہن ۔ دورے دے دوران چیف آف آرمی سٹاف کوں چھل متاثرہ علاقیں وچ بچاؤ اتے امدادی کاروائیاں بارے وچ موجودہ صورتحال تے تفصیلی بریفنگ ݙتی ڳئی ۔ سول انتظامیہ نال ڳالھ مہاڑ کریندے ہوئیں انہاں گڈ گورننس اتے عوامی خدمت تے مبنی ترقی دی اہمیت تے زور ݙتا انہاں سیلاب توں تھیوݨ آلی تباہ کاریاں توں عوام دے تحفظ کیتے بنیادی ڈھانچے دی ترقی سودھے سارے ضروری اقدامات کوں تکھی کرݨ دی لوڑھ تے وی زور ݙتا ۔ انہاں آکھیا ریاست ہر سال قیمتی جاناں اتے املاک دے ضیان دی متحمل نی تھی سڳدی۔ انہاں چھل توں متاثرہ کمیونٹیز کوں پیش آوݨ آلے چیلنجز نال نبڑݨ سانڳے مربوط سول ملٹری کوششاں دی اہمیت کوں اجاگر کیتا اتے عوامی فلاح کیتے سارے اقدامات دی مدد سانڳے پاک فوج دے غیر متزلزل عزم کوں وی دھرا ئے ۔ چیف آف آرمی سٹاف پاک فوج اتے سول انتظامیہ دی طرفوں ریسکیو کیتے ڳئے متاثرین چھل نلا ڳالھ مہاڑ دے دوران انہاں دی آبادکاری اتے بحالی وچ تعاون جاری رکھݨ دا یقین ݙیوایا۔آرمی چیف امدادی کاروائیاں وچ مصروف فوجی جواناں، ریسکیو 1122 اتے پولیس اہلکاراں نال ملاقات وی کیتی ۔ انہاں ٻہوں اوکھے حالات وچ قوم دی خدمت کیتے انہاں دے وݙے حوصلے، آپریشنل تیاری اتے ثابت قدمی دی تعریف کیتی ۔ انہاں لوکاں کوں ویلھے سر ریلیف اتے امداد ݙیوݨ سانڳے سول انتظامیہ دے نال نیڑے دے رابطیں دے حوالے نال انہاں دی 24 گھنٹے جاری کوششاں دی وی تعریف کیتی ۔ چیف آف آرمی سٹاف نقصان دی صورتحال اتے جاری امدادی سرگرمیاں دا جائزہ گھنݨ کیتے لاہور، قصور، ملتان اتے جلال پور پیر والا دے نال نال چھل توں متاثرہ علاقیا دا ہوائی معائنہ وی کیتا ۔ ایں توں پہلے چھل توں متاثرہ علاقیں وچ پڄݨ تے فیلڈ مارشل دا استقبال لاہور اتے ملتان دے کور کمانڈرز کیتا۔
