اسلام آباد ۔ 11 ستمبر (اے پی پی) وزیراعظم محمد شہباز شریف قطر دے خلاف اسرائیلی جارحیت تے امیر قطر شیخ تمیم بن حمد الثانی، قطری شاہی خاندان اتے قطری عوام نال اظہار یکجہتی کیتے ھک ݙینہہ دے دورے تے دوحہ روانہ تھی گئن۔ خمیس کوں پی ایم آفس دے میڈیا ونگ توں جاری تھیوݨ آلے ھک بیان موجب نائب وزیرِ اعظم تے وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اتے معاون خصوصی طارق فاطمی وزیراعظم دے وفد اچ شامل ہن۔ وزیراعظم دوحہ اچ قطر دے امیر شیخ تمیم بن حمد الثانی نال ملاقات کریسن اتے دوحہ تے بلاجواز اسرائیلی جارحیت اتے بین الاقوامی قوانین دے صریحاً خلاف حملے دے تناظر اچ قطری امیر اتے قطری عوام نال یکجہتی دا اظہار کریسن۔ قطر اتے پاکستان وچال دیرینہ تاریخی اتے برادرانہ تعلقات ہن جیڑھے جو مشترکہ مذہب اتے اقدار تے مبنی ہن، پاکستان ھمیشہ قطر دا ہر اوکھے ویلھے نال ݙتے اتے ݙیندا رہسی، ایں دا اظہار وزیراعظم قطری امیر نال ملاقات اچ کریسن۔ ملاقات اچ اسرائیل دے خطے دے مختلف ملکاں تے بلاجواز حملیاں اتے مسلسل جارحیت دے نال نال علاقے اچ امن دے قیام کیتے وی مشورے تھیسن۔
